வடக்கில் உள்ள இராணுவத்தினரின் எண்ணிக்கை குறைக்கப்பட வேண்டும் என இரா.சம்பந்தன் வலியுறுத்தியுள்ளார்.

General News and news Articles / செய்திகள், செய்திக் கட்டுரைகள்

[5/21/2012 ] [cmr news bulletin ]

வடக்கில் எட்டுப்பேருக்கு ஓர் இராணுவச் சிப்பாய் என்ற நிலைமைதான் உள்ளது. அதனால் படையினரின் எண்ணிக்கையைக் குறைக்க வேண்டும் எனத் தாங்கள் கோருவதாகவும் படைத் தளங்கள் அகற்றப்பட வேண்டும் எனக் கோரவில்லை என்றும் தமிழ்த் தேசியக கூட்டமைப்பு கூறியுள்ளது.

வடக்கிலிருந்து இராணுவ முகாம்கள் அகற்றப்படமாட்டா என்றும், படைக்குறைப்பு செய்யப்படமாட்டாது என்றும் ஜனாதிபதி மஹிந்த ராஜபக்ஷ தெரிவித்திருப்பது தொடர்பாக கூட்டமைப்பின் தலைவர் இரா.சம்பந்தன் கருத்து வெளியிட்டார்.

வடக்கிலிருந்து இராணுவ முகாம்கள் முழுமையாக அகற்றப்படவேண்டுமென் எப்போதுமே கோரவில்லை. அப்படியான எந்தக் கோரிக்கையையும் எந்தச் சந்தர்ப்பத்திலும் முன்வைத்ததில்லை. இராணுவத்தின் பிரசன்னம் அங்கு குறைக்கப்படவேண்டுமென்றே தாம் எப்போதும் வலியுறுத்தி வருவதாக அவர் தெரிவித்தார்.

அளவுக்கதிகமான இராணுவப் பிரசன்னம் மக்களின் அன்றாட வாழ்க்கையில் அசௌகரியத்தையும், அவமானத்தையும் கொடுக்கும் வகையில் இருக்கிறது.

மக்களின் அன்றாட வாழ்க்கையின் சகல கருமங்களிலும் படையினரின் தலையீடு இருக்கிறது. மக்கள் செய்யக்கூடிய விவசாயம், கைத்தொழில், வியாபாரம் என்பவற்றைக் கூட இராணுவமே செய்யும் ஒரு நிலைமை வடக்கில் உள்ளது.

மக்களின் தனிப்பட்ட வைபவங்களில் எந்தவித அழைப்பும் இல்லாமல் படையினர் கலந்துகொள்கின்றனர். அங்கு சிவில் நிர்வாகம் தொடர்பான தீர்மானங்களை அரச அதிபரோ, பிரதேச செயலாளரோ எடுப்பதில்லை. மாறாக படையினர்தான் அங்கு சிவில் நிர்வாகத்தின் தீர்மானங்களை எடுக்கின்றனர் என சம்பந்தன் குறி;பிட்டார்.

வடக்கு, கிழக்கில் இருப்பதுபோலான நிலைமை தெற்கில் இல்லை. ராஜபக்ஷ குடும்பத்தினர் முதலில் யதார்த்தத்தை உணரவேண்டும். எதைச் சொன்னாலும் அவர்கள் உண்மையைப் பேசுவதில்லை என அவர் சுட்டிக்காட்டினார்.