வடக்குக் கிழக்கில் உள்ள படைமுகாம்கள் குறைக்கப்பட மாட்டாதென கோதபாய ராஜபக்ஷ தெரிவித்தார்.

General News and news Articles / செய்திகள், செய்திக் கட்டுரைகள்

[5/11/2012 ] [cmr news bulletin ]

வடக்கு கிழக்கு மாகாணங்களில் உள்ள படைமுகாம்கள் குறைக்கப்படமாட்டாதென பாதுகாப்பு அமைச்சின் செயலாளர் கோதபாய ராஜபக்ஷ தெரிவித்தார்.

படிப்பினைகள் ஆணைக்குழு அறிக்கையில் கூறப்பட்டவாறு படையினரின் எண்ணிக்கையை குறைக்க வேண்டுமென்ற அவசியம் அரசாங்கத்துக்கு இல்லையென இலங்கை வானொலிக்கு இன்று காலை வழங்கிய நேர்காணல் ஒன்றில் அவர் கூறினார்.

வடக்கு கிழக்கில் தற்போது இயல்பு நிலை காணப்படுவதாகவும், தமிழ்த் தேசிய கூட்டமைப்பு யதார்த்தமாக சிந்தித்து செயற்பட வேண்டுமெனவும், வெளிநாடுகளுக்கு சென்று அரசாங்கத்தை பற்றி முறையிடுவதால் தமிழ் மக்களுக்குக்கு கிடைக்கக்கூடிய சலுகைகள் இல்லாமல் போகுமெனவும் அவர் எச்சரித்தார்.

தம்புள்ள பள்ளிவாசல் இடிக்கப்படவில்லையெனவும், எந்த மதத் தலமும் உடைக்கப்பட அரசு அனுமதிக்காதெனவும், பௌத்த சமயத்துக்குரிய மரியாதை வழங்கப்படவேண்டுமெனவும் அவர் கூறினார்.

அரசாங்கத்துக்கு அபகீர்த்தி ஏற்படுத்தும் நோக்கில் எதிர்க்கட்சி உறுப்பினர்கள் சிலர் செயற்படுவதாகவும், தமிழ் இனவாத குழுக்களுடன் சேர்ந்து நாட்டில் குழப்பத்தை உருவாக்க அவர்கள் முற்படுவதாகவும் கோதபாய ராஜபக்ஷ குற்றம்சாட்டினார்.