அனுராதபுரம் சிறைச்சாலையில் தாக்கப்பட்ட தமிழ்க் கைதி ஒருவர் ராகம மருத்துவமனையில் மரணமானார்.

General News and news Articles / செய்திகள், செய்திக் கட்டுரைகள்

[7/4/2012 ] [cmr news bulletin ]

அனுராதபுரம் சிறைச்சாலையில் சிறைக் காவலர்களினால் தாக்கப்பட்டு படுகாயம் அடைந்த நிலையில் ராகம மருத்துவமனையில் அனுமதிக்கப்பட்டிருந்த தமிழ் அரசியல் கைதி ஒருவர் இன்று காலை உயிரிழந்தார்.

உயிரிழந்தவர், வவுனியா நெலுக்குளம் பிரதேசத்தை சேர்ந்த 34 வயதான நிமல் ரூபன்; என்று தெரியவருகிறது.

அனுராதபுரம் சிறைச்சாலையில் சிறைக் காவலர்களினால் தாக்கப்பட்டு படுகாயமடந்த நிலையில் மகர சிறைச்சாலைக்கு இடமாற்றம் செய்யப்பட்டு உரிய சிகிச்சைகள் இன்றி மகர சிறைச்சாலையில் தவித்த நிலையில், நேற்று மாலை ராகம மருத்துவமனையில் அனுமதிக்கப்பட்டார்.

கொள்பிட்டியில் உள்ள மனித உரிமைகள் இல்லம் எடுத்த முயற்சியினால் அவர் மருத்துவமனையில் னுமதிக்கப்பட்டதாகவும், இன்று காலை அவர் மருத்துவமனையில் உயிரிழந்ததாரெனவும், மனித உரிமைகள் இல்லத்தின் வழக்கறிஞர் ரத்னவேல் தெரிவித்தார்.

தாக்கப்பட்டு கை கால்கள் முறிந்த நிலையில் உள்ள 30 தமிழ் அரசியல் கைதிகளுக்கும் சிகிச்சையளித்து அவர்களை விடுதலை செய்வது தொடர்பாக அரசியல் கட்சி தலைவர்கள் கலந்துகொண்ட கூட்டம் ஒன்று மனித உரிமைகள் இல்லத்தில் இன்று காலை நடைபெற்றுக் கொண்டிருந்தபோது நிமல் ரூபன்; என்ற கைதி உயிரிழந்த தகவலை ரத்னவேல் வெளியிட்டாரென எமது கொழும்பு செய்தியாளர் குறிப்பிட்டார்.

இந்த கைதியின் உயிரழப்பு மரணம் அல்ல, மாறாக அது திட்டமிடப்பட்ட இனப்படுகொலை என கூட்டமைப்பின் பேச்சாளர் சுரேஸ் பிரேமச்சந்திரன் தெரிவித்தார்.