இலங்கையின் வடமாகாணத்தில் பெருமளவு மக்கள் உணவுப் பாதுகாப்பு இன்றி உள்ளதாக ஐக்கிய நாடுகள் அமைப்புத் தெரிவித்தது.

General News and news Articles / செய்திகள், செய்திக் கட்டுரைகள்

[7/10/2012 ] [cmr news bulletin ]

இலங்கையின் வடமாகாணத்தில் வசிக்கும் பெருமளவு மக்கள் உணவுப் பாதுகாப்பு அற்ற நிலையில் உள்ளதாக ஐக்கிய நாடுகள் அறிக்கை ஒன்று குறிப்பிடுகிறது.

இருப்பினும், கடந்த ஆண்டுடன் ஒப்பிடும்போது, நிலைமையில் சிறிதளவு முன்னேற்றம் ஏற்பட்டுள்ளது.

வடமாகாணத்தில் உள்ள ஐந்து மாவட்டங்களில், 44 சதவீதமானவர்கள் உணவுப் பாதுகாப்பு அற்ற நிலையில் உள்ளதாக இவ்வாண்டிற்கான உலக உணவுத் திட்டத்தின் ப+ர்வாங்க அறிக்கை குறிப்பிடுகிறது. அதில் 7 சதவீதமானவர்கள் மிக மோசமான உணவுப் பாதுகாப்பு நிலையில் உள்ளார்கள்.

யாழ்ப்பாணத்தில் அதிக அளவாக, 55 சதவீதமானவர்கள் உணவுப் பாதுகாப்பு அற்ற நிலையில் உள்ளார்கள். வட மாகாணத்தில் உணவுப் பாதுகாப்பு அற்ற மக்களில் 65 சதவீதமானவர்கள் யாழ்ப்பாணத்தில் வசிக்கிறார்கள். அங்குள்ளவர்களில் 55 சதவீதமானவர்கள், வறுமைக் கோட்டின் கீழ் உள்ளார்கள்.

கடந்த ஆண்டு வட மாகாணத்தில் 60 சதவீதமானவர்கள் உணவுப் பாதுகாப்பு அற்ற நிலையில் இருந்தார்களென உலக உணவுத் திட்டம் தெரிவித்தது.

நிலைப்பாட்டில் முன்னேற்றம் ஏற்பட்டுள்ளபோதிலும், வட பகுதியின் சில பகுதிகளில் உணவுப் பாதுகாப்புக் குறித்த பாரதூரமான கரிசனை நிலவுகிறதென வட மாகாணத்திற்கான உலக உணவுத்திட்ட அலுவலக பொறுப்பதிகாரி ஜூலியா வஸ்கொன்செலொஸ் (Julia Vasconcelos) தெரிவித்தார்.

உணவுப் பொருட்களின் விலைகள் அதிகரிப்பது, வேலைவாய்ப்புக்கள் இல்லாதமை, அதிகளவு வறுமை நிலவுவது போன்றன இதற்குக் காரணமென அவர் கூறினார்.