தமிழ்த் தேசிய மக்கள் முன்னணியின் இரண்டு உறுப்பினர்களின் வீடுகள் மீது யாழ்ப்பாணத்தில் தாக்குதல் இடம்பெற்றது.

General News and news Articles / செய்திகள், செய்திக் கட்டுரைகள்

[7/17/2012 ] [cmr news bulletin ]

யாழ்ப்பாணத்தில், தமிழ்த் தேசிய மக்கள் முன்னணியின் மூத்த உறுப்பினர்கள் இரண்டு பேரின் வீடுகள் மீது அடையாளந் தெரியாத நபர்கள், கழிவு எண்ணை, மற்றும் கற்களை வீசித் தாக்குதல் நடத்தினார்கள்.

அகில இலங்கைத் தமிழ் கொங்கிரஸ் கட்சியின் தவிசாளரும், தமிழ்த் தேசிய மக்கள் முன்னணியின் உப தவிசாளருமான ராயப்பு ஜோசப் ஆனந்தராஜாவின் நெல்லியடி வீடு, மற்றும், தமிழ் தேசிய மக்கள் முன்னணியின் மத்திய குழு உறுப்பினர் தங்கராஜா காண்டீபனின் குடத்தனை வீடு என்பன மீது இன்று அதிகாலை தாக்குதல் இடம்பெற்றது.

வீடுகளின் கண்ணாடி யன்னல்கள், சுவர்கள் என்பனவும் உட்பகுதிகளும் சேதமடைந்தபோதிலும், யாரும் காயமடையவில்லை.

தமிழ் அரசியல் கைதிகள் மீது இடம்பெற்ற தாக்குதல்களுக்குக் கண்டனம் தெரிவித்து நெல்லியடியில், தமிழ்த் தேசிய மக்கள் முன்னணி நாளை ஆர்ப்பாட்டம் ஒன்றை நடத்தவுள்ள நிலையில், ஆர்ப்பாட்டத்தை ஏற்பாடு செய்வோர் மீது தாக்குதல் இடம்பெற்றுள்ளதாக தமிழ்த் தேசிய மக்கள் முன்னணியின் தலைவர் கஜேந்திரகுமார் பொன்னம்பலம் நெல்லியடியில் ஆனந்தராஜாவின் வீட்டைப் பார்வையிட்ட பின்னர் செய்தியாளர்களிடம் தெரிவித்தார்.

தமது எதிர்ப்புப் போராட்டம் ஜனநாயக வழியிலானதெனவும், எந்தச் சட்டத்தையும் மீறவில்லையெனவும், எதிர்ப்புப் போராட்டங்களை நடத்தும் உரிமை தமக்கு உள்ளதெனவும் அவர் கூறினார்.